“Estatua” deitzen dugun gainegitura politikoaren eginbeharra zein da? Neoliberalismoaren garaian bistan da zertarako erabiltzen dute eliteek Estatua: publikoa pribatizatzeko. Publikoa, komunitatearen mesederako jarri beharrean, Estatua bereganatu duten taldeen mesederako egokitu da.
Ikuspuntu horrek irrazionalak ematen duten erabaki asko ulertzen laguntzen du. Hala nola: erraustegia, AHT, segurtasuna, kanpoko kaia… PNV holding batek erabiltzen duen marka komertziala da. Hori baino ez da eskuin abertzalea.
– Mafia guztiek zaborra dute negozio arlo lehenetsia. Eta Gipuzkoan ederki ikusten da. erraustegia egitea, erraustegia elikatzea, erraustegia kudeatzea (horregatik, adibidez, jende langilea kontratatzea zaborra banatzeko iraintzat hartzen dute), adar jotze itzela da.
– Seguritate pribatuaren enpresak kudeatzea eta eskoltak kontratatzea berriz ere negozio ederra izango da. Hor ere PNV markakoek euren txokoa izango dute. Ez dago ondo ikusita, baina tira, beltz komunista indarzale bat loratu badute azken aste honetan zehar, lege totalitario horren alde bozkatu eta legea onartzen ez dutela esateko lotsa nolatan ez dute izango?.
– Hego Euskal Herrian tren azkarraren bi zati absurdo izango ditugu. Iruñea – Kastejon (agian Los Arcoseko kotxe zirkuituan sartuko?) eta… eta… nola esan? Nola deitu, adibidez, Tolosaldean egiten duten triskantza horri? Hitzik ez. Baina hor porlana, azpikontratak, segurtasuna… txantxullo denak batzen dira.
Gure eskualdean adibideak ez dira makalak. Antxoko bariantea toki berean bi aldiz egin izana da, behar bada, adibiderik zitalena. Egun, PNV markapean porlanaren arlo komertzialak Pasaiako kanpoko kaia berpiztu nahi duela ematen du. Bai, bai. Mega erraldoia izan behar zuena, ezinbestekoa zen hura, nahiz eta gerora erdiarekin aski omen. Bo, ta horren erdiaren erdia Iberdrolarentzako oparia izan.
Hau dela eta, pozgarria da ikustea udalak batasuna lortu duela Portuaren inguruan. Horregatik, ez gaitu harritzen portuaren marka komertziala den Pasaiako PNVren jarrera.
Izan ere, erraustegiaren absurdoa, segurtasun legea, AHTren iruzurra, kanpoko kaiaren zentzugabekeria, Bidegi, zein Araban eta Bizkaian agerikoa den ustelkeria… hori da PNVren estiloa. Ez dago gehiago. Ilusoei ziria sartzeko ilusionismoa. Surik gabeko kea.
Latza egiten ari zaigu gobernatzea. Gure buruarekin zalantzak ditugula ematen du. PNVren txuleria legendarioak pisu handia du. Diru publiko oparoa eta diru publikoaren xahuketan zetzan haien itxura ona. Ekarri milloiak neri! Batzuk gastatu, besteak desiberatu, eta ematiza ikusgarria. Gestore bikaina. Hori zen trukua. Orain, gu hori dena konpontzen haien hatsa bizkarrean: “ez dakizute” “ez dakizute” “gaztea zara moñoña” “utopikoak zarete” “atzera zoazte”… brum brum brum mezako letania.
PNVk ez du zalantzarik ordea. Bat-batean, Bizkaian berziklatzearen aldeko iragarkiak; hango aldundiak Gipuzkoakoaren zerga politikari begiratzen dio; era berean, Gipuzkoan maniobrak egiten ditu kontrairaultza zuri baterako (tamalez eta minez PSOEren eskutik), Bidegi entzun eta kaka larria sartzen zaie…
Eta Pasaian, eskuin abertzalea haren enpresako nagusiarentzat kapataz eta bozgailu lanak egiten.
PNV da guk izan nahi ez duguna. Uste baino zokoratuagoa dugu. Gure lanari esker da. Gure ordezkari politikoen lanari esker da.